Sport

McGregor zyrtarizon rivalin e radhës: Shihemi në dhjetor

Gëzuar ditëlindjen Frankie. Shihemi në dhjetor”. Ka qenë ky postimi i bërë nga Conor McGregor në faqen e tij zyrtare në Twitter, ku i uron ditëlindjen Frankie Edgar.

Fjalët e shkuara aty konfirmojnë se irlandezi, ish-kampion i dyfishtë në artet marciale mikse, do të duelojë ndaj amerikanit Frankie Edgar, gjithashtu një ish-kampion bote.

Pas këtij mesazhi ka ardhur edhe përgjigjja e Edgar: “Faleminderit vëlla. I kam thënë po me kohë kërkesës tënde. Ti dhe Dana White e keni në dorë që kjo gjë të ndodhë”.

Komunikimi mes dy sportistëve ka vijuar edhe më tej. Këtë herë është McGregor që i dërgon një kërkesë Dana White, presidentit të UFC-së.

White, organizoje sfidën. Paratë e mia do të jepen për bamirësi. Pres përgjigje. Një për të gjithë”, shkruan McGregor.

Duket se palët janë dakord për të zhvilluar këtë duel të madh në UFC. Edgar dueloi për herë të fundit në eventin UFC-240, që u zhvillua në korrik të këtij viti, ndërsa McGregor nuk duelon që prej eventit UFC-229, që u zhvillua një vit më parë.